Apps de moceo? Mellor, esta web de viaxes

Unha viaxe pode ser unha boa excusa para mocear

Que lonxe quedan os días nos que as citas a cegas eran unha excitante maneira de buscar o amor… ou o que xurdise. Despois de que as webs de contactos se fixesen co poder e o speed dating e as apps de moceo (mellor non falar da sempre controvertida Tinder) tomasen o relevo, no horizonte do amor post-moderno vén de aparecer unha nova fórmula: viaxes para solteir@s. Unha oda ao desexo de aventura (sentimental).

Mesturar destinos exóticos e viaxeir@s abert@s a intimar con outr@s viaxeir@s non é un concepto novidoso. Hai algo máis típico que os romances de verán, os frechazos en aeroportos ou os flirts macarrónicos con estranxeir@s? E é que as vacacións, esa desconexión temporal da realidade do día a día, coa súa dose de relaxación, desenfado e benestar fan rebulir as nosas endorfinas.

MissTravel propón viaxes para coñecer mellor xente interesante
As citas a cegas acadan unha nova -e inesperada- dimensión 

Pero se agardar a que a casualidade nos poña o amor no camiño e a reacción química con ese(s) outro(s) seres especiais se produza semella demasiado azaroso, xa existe unha plataforma de moceo online que nos axuda a darlle un empurrón ao proceso. Acabouse fantasiar con coñecer alguén durante unha escapada. A web MissTravel transfórmao en realidade (máis ou menos).

A súa misión: poñer en contacto a singles viaxeir@s que buscan compañía para compartir a súa próxima aventura e, quizais, algo máis á volta. Mais, ao contrario das páxinas de moceo ao uso, que se limitan a servir de canle de comunicación entre solteir@s, MissTravel convída@s a pasar á acción e programar rutas xunt@s. Á fin de contas, “viaxar é un xeito estupendo de namorarse e unha proba fundamental para unha relación”, sostén Hannahmae Dela Cruz, portavoz de MissTravel.

Ao darse de alta, @s usuari@s teñen a posibilidade de crear unha proposta de viaxe (co lugar e punto de partida, que facer durante a estancia, o tempo de duración desta) e agardar a que alguén se interese por ela. Iso si, unha vez conectad@s -e antes de poñer rumbo ao sitio escollido-, nunca está de máis intercambiar a información persoal básica para asegurarse de que o plan non se converte nun fracaso anunciado.

As citas 'online' chegan agora acompañadas de viaxes
MissTravel, presente en 135 países, dálle unha volta de porca ao moceo na Rede

Como en calquera cita a cegas, o momento clave é, sen dúbida, o do encontro no aeroporto, a estación ou a parada de turno. Risas nerviosas e conversas triviais para romper o xeo están aseguradas. Só queda cruzar os dedos para que @ potencial namorad@ cumpra coas expectativas xeradas. Se non, será cuestión de seguir buscando. Hai moitos peixes nas augas do amor 3.0.

@Ce_FerSan | Fotos: misstravel.com