Ghee, a manteiga india que causa sensación

Queda co nome desta manteiga india: 'ghee'

Se fai tan só un ano alguén nos dixese que a manteiga ía ocupar un espazo privilexiado entre os alimentos de moda en 2018, teriamos pensado que desvariaba. Pero é que esta non é manteiga, senón A manteiga. O ghee está noutra dimensión, e propuxémonos descubrir se hai motivo para tanto balbordo.

Despois de mirar por enriba do ombreiro durante décadas a cociña con calquera cousa que non fose aceite de oliva, vimos de aprender -non sen sorpresa- que quizais os nosos prexuízos sobre a manteiga e o seu elevado contido calórico estean mal fundamentados.

De ser visto desde a distancia como unha cheirenta manteiga de orixe india, pouco saudable e capaz de colapsar arterias e veas ao seu paso, o ghee aterra nos mercados occidentais reconvertido nun poderosos “superalimento”.

O 'ghee' é manteiga "clarificada"
Que non te engane o seu aspecto, non é simple manteiga

Poida que o efecto reclamo que exercen creadoras de tendencias como Kourtney Kardashian ou Ariadne Artiles teña algo que ver niso, mais non faltan as voces especializadas que avalan esta repentina paixón. A experta en nutrición deportiva Lovneet Batra afirma, por exemplo, que

o ghee é único, posto que contén triglicéridos de cadea media, que axudan a queimar a graxa estomacal e a estimular o metabolismo.

Sorprendid@? Pois iso non é todo. Malia conter ácidos graxos saturados, diversas investigacións apoian a teoría de que reduce os problemas coronarios e favorece o colesterol “bo”.

Os beneficios do ghee son tamén coñecidos pol@s deportistas (e non só da India e Paquistán). De feito, considérase que contribúe a mellorar e fortalecer as articulacións e a facer máis flexible o tecido conectivo, potenciando ademais a absorción de vitamina A, D, E e K.

Se outras graxas son acusadas de causar problemas estomacais e intestinais, esta fai o efecto contrario: suaviza o colon e o tracto dixectivo e axuda a que o fígado se depure.

Mais non só ten vantaxes a nivel interno. O consumo habitual de ghee reflíctese no estado da pel grazas, precisamente, á súa especial intervención no procesamento das vitaminas.

Na cociña, a chef neoiorquina Christina Lecki -defensora deste ingrediente- recoméndao para a preparación de pratos vexetais, pois engádelles un sabor e unha riqueza de matices difíciles de acadar coa manteiga ordinaria e mesmo co aceite. Pódese usar en cru (ao xeito tradicional) ou fundida.

En cru ou fundido, o 'ghee' é un comodín na cociña
As aplicacións culinarias desta peculiar manteiga son innumerables

A xeito de curiosidade, hai que dicir que soporta unha temperatura maior, co punto de fumegado entre os 230 e os 250 ºC, polo que tarda máis en liberar substancias tóxicas para a saúde.

Pero que é, entón, o ghee?

É un tipo de manteiga, por suposto, pero cunhas características que a fan única. Trátase de manteiga “clarificada”, resultante de fundila a lume baixo ata que os sólidos lácteos da tona adopten unha cor marrón (o que logo lle outorgará un aroma doce) antes de retiralos. En orixe, obtíñase de leite de búfala, substituído na actualidade polo de vaca. Este produto é unha das claves do método ayurveda para o benestar integral. Ten sona de posuír propiedades para o coidado emocional e espiritual, calmando os nervios e desenvolvendo a intuición. Por non mencionar que está considerado como un aliado da lonxevidade.

Quen se apunta a tomar unha cullerada? Paga a pena darlle unha oportunidade.

@Ce_FerSan | Fotos: Instagram @kefirlove, @the_dailyroutine, @gheeeasy_jp