O café de moda é o cold brew

'Cold brew', a fórmula do café que te sorprenderá

Co retraso da chegada do outono meteorolóxico e a artificial prologanción da calor, ata fai tan só unhas semanas a roupa de abrigo e as bebidas quentes non entraban nos nosos plans. E buscando alternativas refrescantes, no eterno verán de 2017 importamos definitivamente unha nova interpretación do café que nos Estados Unidos elevan á categoría de bebida para sibaritas. É o cold brew, e ten a súa ciencia.

A cultura do café, tan desenvolvida na veciña Italia, por exemplo, vai callando pouco a pouco no noso país. Cada vez entendemos máis e mellor sobre procesos, elaboracións e presentacións do revitalizante por excelencia.

Porén, entre listas de variedades, orixes do gran e tipos de torrado, aínda nos quedaba por familiarizarnos coa fórmula do cold brew. E é que este é unha rara avis no universo cafeteiro. Tanto, que se prepara en frío. Non, non é o clásico preparado estival nun vaso con anacos de xeo. Presta atención.

Pablo Caballero, co-fundador de Hola Coffee -cafetaría de autor en Lavapiés-, é todo un especialista na materia. Explica:

O cold brew é unha infusión de café en auga fría que se deixa de 12 a 24 horas en contacto ata que se filtra o líquido.

Trátase, xa que logo, dun proceso de extracción de natureza artesá co que se pretende conseguir un concentrado de café pouco común. O resultado diso é unha verdadeira delicatessen.

Café en infusión, así é o 'cold brew'
Anímate a probar esta infusión de café

Ese tempo de repouso substitúe o efecto ordinario da calor á hora de sacar a esencia e o sabor do gran á superficie.

O cold brew, que para @s non entendid@s non deixa de ter aparencia dun café augado, require unha certa adaptación do gusto. Mais, unha vez acostumado o padal, descúbrense nel matices inesperados, mesmo unha maior dozura, cun sabor menos agresivo.

En Nova York está á orde do día, unha opción normalizada. Comezou a popularizarse a primeiros desta década, e xa é habitual ver xente polas rúas con vasos transparentes de cold brew no canto dos clásicos cafés en servizos de cartón ou plástico.

A primavera e o verán son o contexto natural desta bebida, aínda que @s aficionad@s non se resisten a seguir gozando dela o resto do ano.

Santiago Rigoni, dono do local especializado Toma Café -no centro de Madrid-, confirma o doado que é elaborala na casa:

Abonda cunha cazola, bo café, auga embotellada ou filtrada e as proporcións dadas polo teu cafeteiro.

Só, con xeo ou cunha pinga de leite, o cold brew semella ter chegado para quedar na carta de cafetarías de barrio ou das grandes cadeas.

@Ce_FerSan