O kimchi é a sensación gastronómica do ano (disque)

O 'kimchi' é o prato nacional de Corea

As elaboracións con longa tradición están de moda. E quen di longa, di ancestral. Como o kimchi, ese prato chegado de Corea que conseguiu posicionarse como o novo alimento de moda en Occidente. Nos foros foodie xa comezou a dar que falar o ano pasado. En xaneiro de 2017, acadou a categoría de estrela á alza na feira das vanidades gastronómicas. Camiño de cumprirse a predición, quixemos investigar por nós mesm@s en que consiste. Pasemos ata a cociña.

Os fermentados son agora o equivalente aos licuados verdes de fai un par de temporadas: un terreo fértil do que nunca saberemos dabondo e que posúe a dose xusta de marketing alimentario e soporte nutricional para resultar atractivo. Se o kefir é todo un clásico, a kombucha e o kimchi veñen pisándolle os talóns. Todo sexa por acadar o benestar orgánico do que semellan ser transmisores grazas aos seus efectos probióticos.

Pero o valor do kimchi en particular transcende o plano estritamente médico. En novembro de 2015, antes de que a febre por el se tornase en delirio, a UNESCO declarouno patrimonio cultural inmaterial.

A que che vai picando a curiosidade? Pois entremos logo en materia.

Desde Corea, chega con forza o 'kimchi'
Máis que un alimento,o ‘kimchi’ é un sistema de elaboración

O kimchi é o fermentado máis sinxelo do que temos noticia, o que non deixa de ser un alivio á hora de incorporalo á dieta. En realidade, a súa versión tradicional componse dunha base de col chinesa deshidratada con sal e mesturada con outras verduras crúas, sazonadas con allo, xenxibre, salsa de peixe (caldo de anchoas ou gambas, orixinalmente, de tenreira) e unha boa dose de flocos de chile coreano.

Para quen estea familiarizad@ co chucrut do leste de Europa, o aspecto deste prato con formato de conserva non será ningunha sorpresa. Iso si, o proceso de elaboración é máis curto. Só hai que introducir os elementos anteriores nun bote de cristal e… listo para gardar na neveira. Que comece a fermentación!

Se te decides a facer o teu propio kimchi (haino de bote, pero, ademais de ser moi caro, non posúe a característica acción probiótica ao estar envasado ao baleiro), aproveita para levar un seguimento diario del. Sorprenderate comprobar que o sabor vai variando lixeiramente, adquirindo xa sexa acidez, aroma, picor ou textura en función da fase na que se atope e dos ingredientes que conteña.

Un bo kimchi da casa é motivo de orgullo en Corea, así que adopta ese espírito e anímate a consideralo tamén como a túa nova delicatessen. A temperatura, o tempo de fermentación e os compoñentes influirán no resultado obtido. Algo non moi diferente á elaboración dun viño, non si?

Ademais de segundo o gusto persoal, o kimchi incorpora modificacións en función das verduras de cada estación. A primavera é o tempo do de cebola verde, no verán elabórase o de cogombro, o clásico de col é propio do outono e o de nabo, do inverno. En calquera caso, combina estupendamente con arroz ou pasta, en bocadillos ou canda o ramen. Ti elixes.

Con pasta ou con arroz, o 'kimchi' é o prato do momento
Proposta de presentación dun prato de ‘kimchi’

Que propiedades ten o kimchi?

Sen chegar a ser o alimento milagreiro que @s fans dos fermentados pintan, é certo que o kimchi é moi recomendable para case calquera persoa. En primeiro lugar, porque axuda a mellorar a saúde gastrointestinal coidando da flora e fortalece o sistema inmunolóxico grazas ás súas bacterias. Posúe un alto contido en vitamina C, así como A, B1 e B2, polo que ás propiedades anteriores se engade a de ser antioxidante (e anti-envellecemento). Tamén se di que diminúe o colesterol (pola alicina e o selenio do allo) e que desintoxica o fígado (polo isocianato da col e o nabo).

@Ce_FerSan | Fotos: Instagram @erfareena @knoerella_yogaandmore @re____store